राज्यात आज पासून इयत्ता बारावीच्या परीक्षेस सुरुवात झाली आहे. पहिल्याच पेपर मध्ये चुका आढळून आल्या आहेत. इंग्रजी विषयाच्या प्रश्नपत्रिकेत ६ गुणांसाठी विचारलेल्या प्रश्नांऐवजी चक्क उत्तरेच छापून आली आहेत. दरवर्षी प्रमाणे पेपरात चुका ही असणे ही परंपरा बोर्डाने कायम ठेवली आहे, अशीच सध्या सर्वत्र चर्चा आहे.
या संदर्भात अधिक तपशील जाणून घेतला असता इंग्रजी विषयाकरिता ८० गुणांची कृतिपत्रिकेच्या प्रश्न क्रमांक ३ मध्ये १४ गुणांसाठी कवितेवर आधारित प्रश्न विचारले जातात. आजच्या प्रश्नपत्रिकेत a-३,a-४, a-५ या तीन कृतींमध्ये प्रश्नांऐवजी चक्क उत्तरे छापून आली. त्यामुळे विद्यार्थी संभ्रमावस्थेत सापडले. काही विद्यार्थ्यांनी तर गोंधळून प्रश्नांची उत्तरे लिहिलीच नाहीत. सूत्रांनी दिलेल्या माहितीनुसार, बोर्डाने तयार केलेल्या ‘मॉडेल आन्सर’ मधील a-३, a-४, a-५ ही उत्तरे सूचानासह जशीच्या तशीच कृतिपत्रिकेत छापून आली आहेत.
चुकीच्या प्रश्नाचे गुण देण्याची मागणी.
कृतिपत्रिकेतील चुकीच्या प्रश्नांमुळे विद्यार्थ्यांचा वेळ वाया जाऊन त्यांचे शैक्षणिक नुकसान झाले आहे. बोर्डाने विद्यार्थ्यांना इंग्रजी विषयात सरसकट ६ गुण द्यावेत, अशी मागणी विद्यार्थ्यांकडून होत आहे.