दहावी-बारावी बोर्डाची परीक्षा दोन टप्प्यांत घेण्याचा निर्णय केंद्रीय शिक्षण मंत्रालयाने जाहीर केला आहे. त्यामुळे आगामी शैक्षणिक वर्षापासून बोर्डाच्या परीक्षेत मोठे बदल होणार आहेत. नव्या राष्ट्रीय शैक्षणिक धोरणानुसार अभ्यासक्रमाची आखणी करण्यात येत असून, विद्यार्थ्यांना वर्षातून दोनदा बोर्डाची परीक्षा देता येईल. या दोन्ही परीक्षेतील सर्वोत्तम गुण निवडण्याची संधीही विद्यार्थ्यांना उपलब्ध असणार आहे. या बदलाचा विद्यार्थांनाचा मोठा लाभ होणार असल्याचा दावा केंद्र सरकारकडून करण्यात आला आहे. पाठ्यपुस्तके २०२४च्या सत्रात येणार आहेत. Maha Board Exam 2024
दरम्यान विद्याथ्र्यांना बोर्डाची परीक्षा देणे सुलभ व्हावे आणि अधिकाधिक चांगले गुण मिळविण्याची संधी मिळावी, या दृष्टिकोनातून बोर्डाची परीक्षा वर्षातून दोनदा घेण्यात येणार असल्याचे सांगितले जात आहे. याकरिता नव्या राष्ट्रीय शैक्षणिक धोरणानुसार अशा स्वरूपाच्या अभ्यासक्रमाची आखणी करून २०२४ च्या शैक्षणिक सत्रासाठी पाठ्यपुस्तके तयार करण्यात येत असून, पुढील वर्षीच्या विद्यार्थ्यांना या पुस्तकांचे वाटप करण्यात येणार आहे.
अभ्यास पूर्ण झालेल्या विषयांचाच पेपर देण्याचे स्वातंत्र्यही विद्यार्थ्यांना दिले जाईल. याद्वारे राष्ट्रीय शैक्षणिक धोरणात नमूद केल्यानुसार नजिकच्या काळात मागणीनुसार परीक्षा (ऑन-डिमांड) प्रणालीकडे वाटचाल करणे शक्य होणार असल्याचे मंत्रालयाने स्पष्ट केले आहे.केंद्रीय शिक्षण मंत्रालयाच्या निर्णयामुळे सध्याच्या बोर्डाच्या कठीण परीक्षा पद्धतीतून विद्यार्थ्यांची सुटका होणार असल्याचे बोलले जाते.
आगामी काळात देशात दहावी- बारावीच्या बोर्डाची परीक्षा अधिक सुलभ करण्यात येतील. परीक्षांमध्ये अनेक महिन्यांचे प्रशिक्षण आणि स्मरणशक्ती यापेक्षा कौशल्यांचे आकलन आणि यशाचे मूल्यांकन यावर भर दिला जाईल.
विद्यार्थ्यांना विषय निवडीचे स्वातंत्र्य मिळणार –
राष्ट्रीय अभ्यासक्रम आराखड्यानुसार अकरावी आणि बारावीच्या विद्यार्थ्यांना दोन भाषांचा अभ्यास करावा लागणार आहे. दोन्हींपैकी एक भाषा भारतीय असणे अनिवार्य आहे. अकरावी-बारावीसाठी विषयांची निवड विद्याशाखानिहाय नसेल. विद्यार्थी कोणत्याही विद्याशाखेतील विषय निवडू शकतील. त्यामुळे यापुढील काळात कला, वाणिज्य आणि विज्ञान यातील कोणत्याही एकाच विद्याशाखेतून अभ्यास करण्याचे बंधन असणार नाही. विद्याथ्र्यांना त्यांच्या आवडीनुसार विषय निवडण्याचे स्वातंत्र्य देण्यात येईल, असेही मंत्रालयाने सांगितले आहे.